Gjeni argëtimin në të

“Përmbledhja më e trishtë e një jete përmban tre përshkrime: mund të kishte, nëse do të kishte dhe duhej të kishte.”

Louis E. Boone

Disa ditë më parë, po dëgjoja një podkast me një trajner personal që diskutonte për metodën e tij për të ndjekur një rutinë stërvitore sfiduese. Sa më shumë ai ndante idetë e tij, aq më shumë kuptova se plani i tij mund të aplikohet lehtësisht edhe në aspekte të tjera të jetës sime.

Plani i Lojës
Ja disa nga pikat kryesore që mora nga ky trajner fitnesi:

• “Thelbi është se të qëndrosh i lidhur me një rutinë stërvitore do të jetë e vështirë. Duhet të mendosh se çfarë po përfiton nga ajo.”
• “Vërej se disa njerëz, përfshirë edhe veten ndonjëherë, shpesh bëjnë stërvitjen pa pasion. Duhet të ketë një plan loje në vend ashtu që të marrim maksimumin nga stërvitja.“
• “Nuk ka dyshim se të hysh në palestër dhe të bësh rutinën do të bëhet e vështirë. Kur ndodh kjo, duhet të kujtojmë se forma fizike personale kërkon një mendje të fortë. Duhet të jemi të përkushtuar, përndryshe mund t’i themi lamtumirë rezolutave të Vitit të Ri!”

Në fund të podkastit, ai tha diçka që më bëri përshtypje, dhe doja ta ndaja me ju sepse lidhet me atë se si mund të përballim vitin 2024 me guxim …

“Të mbash një rutinë stërvitore gjatë gjithë jetës tënde do të jetë një sfidë, kështu që le të gjejmë argëtimin në të!”

Të gjejmë Argëtimin!
Unë kam fat që kam një palestër në shtëpi, dhe kam peshat dhe makinat që më duhen për të bërë stërvitjet e mia pa pasur nevojë të udhëtoj. Megjithëse më pëlqen komoditeti, ende ka disa ditë që thjesht dua të anashkaloj stërvitjet.

Duke menduar për këshillat e trajnerit personal, kuptova se ka shumë rezultate “argëtuese” që mund të mendoj pasi të kryej detyrat e vështira, dhe ja disa shembuj …

• Më kujtohet kur po mësoja për provimin e lëndës së Financës në studimet baçelor në Universitetin e Shën Mërisë, dhe dukej sikur puna ishte e papërballueshme. Megjithatë, shpërblimi i madh ishte të bëhesha personi i parë në familjen time që diplomohet në kolegj. Argëtim!
• Unë dhe gruaja ime i çonim fëmijët në shumë aktivitete shkollore dhe jashtëshkollore për gati dy dekada, dhe ishte shumë e vështirë të bëhej, sidomos për shkak të angazhimeve të punës. Megjithatë, kur shikojmë pas tani, këto aktivitete i përgatitën ata për të pasur një jetë produktive. Pra … po, argëtim!
• Gjatë viteve të fundit, kam qenë shumë më i përfshirë në aktivitetet vullnetare me karakter bamirësie, dhe kjo punë mund të merrë shumë kohë. Përfitimi i madh është se të jesh në shërbim të të tjerëve më ka bërë një person më të mirë, dhe kam përfituar nga miqësi të shumta. Shumë argëtim!

Duke u afruar viti 2024, kuptoj se shumë sfida janë përpara. Gjithsesi, një mënyrë e mirë për mua të përballoj gjërat e vështira është të mbaj fundin në mend.

Nuk do të jem i përsosur, por për sa kohë të mbaj një qasje pozitive dhe të përulur, jam i sigurt se do të gjej argëtimin në çfarëdo që vendos të bëj!

Qofshit të lumtur në 2024!

_____________________________________

Citate Frymëzuese

“Sekreti i jetës është të shijosh kalimin e kohës.” – James Taylor

“Dhe në fund, nuk janë vitet në jetën tuaj ato që kanë rëndësi. Është jeta në vitet e tua.” – Abraham Lincoln

_____________________________________

Detyrë shtëpie

Oh … si profesor në zemër, e keni marrë me mend, unë kam një pyetje për ju si detyrë shtëpie. Kjo është një pyetje e fuqishme që thjesht mund t’ju nxisë të ndërmerrni veprime për diçka që ka vërtet rëndësi në jetën tuaj.

Çfarë sfide do të kapërceni?

_____________________________________

Dr. Jimmie Flores filloi karrierën e tij të mësimdhënies në Houston Community College në vitin 1991. Gjatë 30 viteve të fundit, ai ka mbajtur poste mësimdhënie dhe drejtuese në universitete të ndryshme. Si edukator, ai është i përkushtuar t’u ofrojë studentëve të tij njohuritë dhe ekspertizën që bëjnë ndryshimin në mjedisin e sotëm dinamik dhe kompleks.

_____________________________________

Shënim: Artikulli u publikua fillimisht nga Dr. Jimmie Flores në buletinin e tij please share this link with others! më 27 Dhjetor 2023. Është riprodhuar në këtë blog me lejen e autorit.

_____________________________________

Kërkoj ndjesë për çdo lëshim të paqëllimtë në përkthim dhe përshtatje.

Shpresoj të jetë artikull i duhur.

Bekim Dauti [përktheu dhe përshtati]